تلسقۆف-KDP.info- فەرماندەیەكی هێزی پێشمەرگە لە میحوەری تلسقۆف دەڵێت، ئەمڕۆ چەكدارانی داعش هێرشیان كردە سەر هێزی پێشمەرگە، بەڵام تۆپخانەكانی هێزی پێشمەرگە بە توندی وەڵامیان دانەوە و لە ئاكامدا پەنجا تیرۆریستی داعش كوژران.
فەرماندەی فەرماندەیی سپیلك لیوا (عەبدولڕەحمان كەورینی)، بە kdp.info-ی راگەیاند، ئەمڕۆ لە هەردوو ناوچەی تلسقۆف و باتما چەكدارانی داعش هێرشیان كردە سەر هێزی پێشمەرگە، بەڵام تۆپخانەكانی هێزی پێشتوانیی یەك، بە توندی بۆردوومانیان كردن و هێرشەكەیان تێك شكاند و تیرۆریستان نەیانتوانی پێشڕەوی بكەن.
(كەورینی) گوتیشی، "هێزی پێشمەرگە گورزێكی كوشندەیان لە داعش وەشاندووە و زانیاریمان بۆ هاتووە كە داعش پەنجا تەرمی چەكدارانی خۆیان بۆ نەخۆشخانەی تلكێف گواستوونەتەوە، كە بە هۆی بۆردوومانی هێزی پێشمەرگەوە كوژراون".
ئەو هەروەها زیاتر گوتی، ئێستا بارودۆخەكە ئارام بووەتەوە و فڕۆكە جەنگییەكانیش مۆڵگەكانی داعش بۆردوومان دەكەن.
بڵند ئیبراهیم