هەولێر-KDP.info-  سەرۆکی پەرلەمانی عێراق بەڵێنی دا کە حکوومەتی عێراق هەموو بەڵێنەکانی جێبەجێ بکات کە بە هەرێمی کوردستنی داون، وێرای سوپاسگوزاریی هێزەکانی پێشمەرگەیش لەو جەنگی دژ بە داعش و بەرقەرارکردنی ئاساییش، راشیگەیاند، حکوومەتی عێراق سوورە لەسەر دابینکردنی مووچەی فەرمانبەرانی هەرێم، بەڵام ئەم پرسە دەکەوێتە دوای پەسندکردنی بودجەی گشتیی عێراق.
لە کۆنگرەیەکی ڕۆژنامەوانیی هاوبەشدا بۆ سەرۆکی پەرلەمانی کوردستان(یووسف محەممەد) و هاوتا عێراقییەکەی(سەلیم جبووری)، کە نیوەڕۆی ئەمڕۆ چوارشەممە لە پەرلەمانی کوردستان ساز درا، (یووسف محەممەد) رایگەیاند "ئێمە دەستپێشخەریی ئەوان بە هەند دەگرین و سەردانیان بۆ هەولێر جێ بایەخی ئێمەیە.. دەمانەوێ هەمووان هاوکار بن  بۆ چارەکردنی گرفتەکانی نێوان هەولێر و بەغدا."
سەرۆکی پەرلەمانی کوردستان هاوکات ڕایگەیاند، "یەکێک لە هۆکارەکانی ئەو گرفتە بە هەوڵی کۆنترۆڵکردنی هەموو عێراقە لە ناوەندەوە، بەردەوامبوونیشی ڕەنگە ببنە هۆی سەرهەڵدانی ناکۆکیی نەتەوەییش، بۆیە هەوڵ دەدەین لە ڕێی دروستکردنی پێوەندیی هەردوو لاوە، چارەیان بۆ بدۆزینەوە."
(یووسف محەممەد) دەربارەی هەڵوێستی پەرلەمانی بەغدایش لە چۆنیەتیی چارەکردنی گرفتەکان گوتی، "سەرۆکی پەرلەمان و ئەو شاندەی کە یاوەریی دەکەن و ئەندامانی لیستی جیان، هەموویان جەختیان لە پشتگیریی چارەکردنی کێشەی ئاوارەکان و مووچە و کۆی کێشەکانی نێوان هەولیر و بەغدا کردەوە و دەڵێن دەبێ چارەیان بۆ بدۆزرێتەوە."
لای خۆیەوە سەرۆکی پەرلەمانی عێراق(سەلیم جبووری)، رایگەیاند کە، "بەڵێن دەدەین کە حکوومەتی عێراق هەموو بەڵێنەکانی پێوەست بە هەرێمی کوردستان جێبەجێ بکات.. پێشوازییش لە بەشداریی وەزیرە کوردەکان بۆ بەغدا دەکەین."
(جبووری) هاوکات گوتی "بۆ بەرەنگاربوونەوەی شاڵاوی تیرۆریستیی داعشیش پێویستمان بە یەکخستنی هێزەکان هەیە. سوپاسی پێشمەرگەیش دەکەین لە جەنگی بەردەوامیان دژ بە داعش، کە لەپێناو دابینکردنی ئاساییش و ئارامی و ئازادییە بۆ ناوچەیەکی فراوانە."
پێوەست بە هاوکاریی عێراق بۆ ئاوارەکان وێڕای سوپاسی حکوومەتی هەرێم لە بەهاناوەچوونی ئاوارەکان، گوتی، "بەرپرسارەتیی ئاوارەکان دەگرینە ئەستۆ و هەوڵ دەدەین لە چوارچێوەیەکی گونجاودا گرفتەکانیان چارە بکەین."
گوتیشی کە لەگەڵ سەرۆکی پەرلەمانی کوردستاندا، باسی بودجەیان کردووە، ئەوەی کە لە چەند مانگی ڕابردوودا وەرینەگرتووە، حکوومەتی عێراق سوورە لەسەر دابینکردنی، بەڵام ئەمە دەکەوێتە دوای پەسندکردنی بودجەی گشتیی عێراق. زیاتر گوتی، "دەزانین کە گەل چاوەڕێی بودجەیە و هەموو هەوڵێک دەدەن بۆ پەسندکردنی."
دەربارەی بڕینی بودجە و مووچەی فەرمانبەرانی هەرێمی کوردستانیش جەختی کردەوە، "پرسی مرۆیی نابێ بخرێتە چوارچێوەی سیاسییەوە و دەبێ ئەم پرسە چارە بکرێ و، بەردەوام هەوڵ دەدەین پێداویستیی گوزەرانی خەڵکی چارە بکەین، کە مووچەی فەرمانبەرانی هەرێم بەشێکە لەو هەوڵانەمان."
دەربارەی ماددەی 140 و ناوچە کوردستانییەکانی دەرەوەی ئیدارەی هەرێم، (جبووری) گوتی، "بڕوامان بە دەستوور و هەموو بڕگەکانیشی هەیە، پەرلەمان لیژنەیەکی تایبەت دروست دەکات بۆ جێبەجێکردنی ماددەی 140."

KDP.info