هەولێر-KDP.info-  سەرۆکی هەرێمی کوردستان(مەسعوود بارزانی) ڕایگەیاند، ئەەگر ستراتیژی هاوبەش هەبێ لەگەڵ سوپای عێراق و هاوپەیمانانی نێودەوڵەتی، هێزەکانی پێشمەرگە لە هەرشوێنێک بێ شەڕی داعش دەکات و تواناکانی خۆیشی لە بەرەنگاربوونەوەی ئەو ڕێکخراوە تیرۆریستییە سەلماندووە.
لە دیمانەیەکیدا لەگەڵ تەلەڤزیۆنی سی ئێن ئێن، (سەرۆک بارزانی) ڕوونی دەکاتەوە، "هەڕەشەکانی داعش تەنیا کوردستان ناگرێتەوە، بەڵکە بەرانبەر بە هەموو دنیایە، بۆیە ئێمە پشتیوانی لە ستراتیژی (سەرۆک ئۆباما) دەکەین لە بەرەنگاربوونەوەی چەکدارانی داعش، داوایشیان لێ دەکەین  ستراتیژەکە بەرفراوانتر بکەن تا هیی دیکەیش بگرێتەوە."
سەرۆکی هەرێمی کوردستان ئاماژەیشی دا، "ڕاستە کە هەندێ ناوچەی لە دەست دان، بەڵام هێزەکانی پێشمەرگە لە ڕۆژی یەکەمەوە سەلماندوویانە کە توانای بەرەوڕووبوونەوەی داعشیان هەیە، هەڵبەت بە هاوکاریی ئەو هەڵمەتە ئاسمانیانە توانویەتی داعش لەو ناوچانەیش دەربکات و ناوچەکە کۆنترۆڵ بکاتەوە، پێشمەرگە توانی بە سەرکەوتووی ئەم ئەرکەی بەجێ بێنێ."
دەربارەی ئەوەیش کە پێشمەرگە لە توانایدا دەبێ لە مووسڵیش شەڕی داعش بکات، (بارزانی) ڕایگەیاند، "ئەرکی لەپێشینەی حکوومەتی هەرێمی کوردستان و هێزەکانی پێشمەرگە پارێزگاریکردن لە سنووری هەرێمی کوردستان و پارێزگاریکردن لە گەلی کوردستان بە پێکهاتە جیاواز و کۆی کەمینەکانەوە، بەڵام ئەگەر تێگەییشتنێک(ستراتیژێکی هاوبەش) لەگەڵ حکوومەتی عێراق و هاوپەیمانانمان هەبێ، ئێمە پشتیوانی هەر جۆر ەبرنامەیەک دەژ بە داعش دەبین، جا لەهەر کوێیەک بن."
پێوەست بە گورزوەشانە ئاسمانییەکانی ئەمەریکایش، (بارزانی) ئاماژەی دا، "ئەو هەڵمەتە سەربازیانەی کە فڕۆکە جەنگییەکانی ئەمەریکا بەرپایان دەکرد، کاریگەرییان بەسەر دۆخەکەوە هەبوو، هاووڵاتیانی مەدەنییش بە هۆیانەوە زیانی پێ نەگەییشتووە، هەماهەنگیی پتەویش لە نێوان هێزەکانی ئێمە و هێزەکانی ئەمەریکادا هەیە."
دەربارەی ئەگەر و توانای ناردنی هێزی سەربازیی ئەمەریکایش، (سەرۆک بارزنی) رایگەیاند، "ئێمە داوای هێزی سەربازیمان لە هیچ وڵاتێک نەکردووە، بەڵام ئەگەر ئەو ئامادەییە هەبێ بۆ بەشداریکردن لە جەنگ، جا لە ڕێی هێزی سەربازییەوە بێ یان گورزی ئاسمانییەوە، پێشوازی لە بڕیاری نێوەدەوڵەتی دەکەین."
لەبارەی هەڵوێستی ئێرانیشەوە، (بارزانی) گوتی، "ئێران ڕۆڵی کاریگەری هەیە و ناکرێ نادیتە بگیرێ، بەڵام لە هاوپەیمانەتیی نێودەوڵەتی دژ بە داعش، بەشداری نەکردووە، چونکە کێشەی لەگەڵ لایەنی دیکە هەیە"، داوایشی کرد "وڵاتە یەکگرتووەکانی ئەەمریکا و ئەمەریکا جیاوازییەکان وەلا بنێن و پێکەوە بۆ لەنێوبردنی داعش بجەنگن و کێشەکانیان تێکەڵ بە بەرەنگاربوونەوەی داعش نەکەن."

زریان زیاد